Principo

Tio estas nek kurso nek restoracio, sed "hispana gastejo", kie ĉiu partoprenanto kunportu ion gustumeblan disvidindan.

Okazas ĉiun ĵaŭdon de la 18a ĝis la 20a
En nia sidejo
Espéranto Île-de-France
4 bis rue de la Cerisaie
75004 Paris

Ĉiu esperantisto estas bonvena, des pli laŭ alporto ! Ĉiu povos libere alveni. Tamen, por organizi, preferinde estas, ke oni sin anoncu.

Nia francilia prezidanto William kaj Michèle strebos organizi tiujn aranĝojn, laŭ deziroj kaj kunlaboro de la volontuloj. Se tio interesas vin, diru viajn demandojn, proponojn, ktp, al William aŭ al Michèle : 01.47.99.75.51.

Ekzemplaj agadoj fareblaj

1. rigardi filmojn : Mazi en gondolando, Pasporto al la tuta mondo, diversaj videokasedoj, ktp
2. ludi : domenoj, homlupo, ktp
3. kanti : eble iu(j) helpos ludante gitaron
4. viziti : ion ne malproksiman, iu gvidante
5. inviti preleganton, precipe alilandanon, sed ne nur
6. skribateliero
7. skribi artikolojn, ekzemple por Le Monde de l’Espéranto, Espéranto-Info
8. krei rakontojn
9. diskuti pri artikoloj, ekzemple el Monato aŭ diversaj temoj
10. aŭskulti prezenton pri iu temo
11. legi saman libron, poste priparolota
12. teatrumi
13. diri poemojn
14. cerbumi pri iu celo aŭ problemo
15. organizi staĝon, feston, vojaĝeton, enketon, manifestacion, ktp
16. kuiri sen krokodili por kunkune manĝi

Pasinta rendevuo

Hodiaŭ, la 3an de Novembro, ni estis 7 por gustumi strangan kivikukon kun ĝia recepto, antaŭ ol strebi pri "krucenigmo" kaj organizigi venontajn ĵaŭdojn tiel :

Venontaj rendevuoj

 10a de Novembro :
— Langarompilo (propono de Isabelle Nicolas)
— "Ĉu ni mortu aŭ prosperu" : artikolo de Etsuo Miyoshi en la lasta numero de "Esperanto Revuo" de UEA pri "testamento" de Geremek.

 17a de Novembro :
— Isabelle Nicolas kunportos Boĵolezan vinon : ĝin trinkate ni rigardos la usonan metodon "Pasporto al la tuta mondo".

 24a de Novembro :
— Ni cerbumos pri la peticio por la Esperanto en la Franca "BAC".